限價單 vs 市價單有咩分別？優缺點分析及使用情況！

喺香港無論買賣港股、美股定ETF，落盤前都必須揀選「限價單」或者「市價單」兩種基本落單方式。兩者喺執行時機、價格控制同成交速度上分別好大，揀錯隨時令你「高追低放」，白白蝕多咗差價。想清楚了解限價單同市價單嘅分別，並揀啱最適合自己交易需要嗰種？即刻睇下去。

[ms-toc]

30秒睇晒文章重點！

• 市價單以現時市場價格即時成交，強調「速度」；
• 限價單就要等股價到達你指定嘅水平先成交，強調「價格控制」.
• 市價單成交確定性高，但有滑點風險（成交價偏離預期）；限價單可以控制成本，但未必一定成交
• 訂單有效期分為「當日有效」（Day Order）、「有效至取消」（GTC）等，仲有IOC、FOK等即時執行條件要留意

市價單同限價單，到底係咩？

市價單（Market Order）

市價單係指落盤時唔指定價格，而係以現時市場上「最佳可成交價」即刻買入或者賣出嘅落單方式。你買入嘅時候，會以賣方嘅賣價（Ask）成交；賣出嘅時候，就會以買方嘅買價（Bid）成交。市價單嘅重點在於「快」，唔會理會實際成交價貴咗或者平咗幾多。

限價單（Limit Order）

限價單就係限定一個你心目中嘅價格，只有股價觸及呢個水平（或者更好嘅價格），落盤指示先會執行。買入限價單嘅價格必須低於或等於現價；賣出限價單則要高於或等於現價。限價單嘅重點在於「控制價格」，寧願等，都唔會用差嘅價錢成交。

市價單 vs 限價單：核心分別一覽

市價單：優點與缺點

優點

• 成交快，優先處理：落盤後幾乎即時完成交易，適合捕捉突發嘅入市時機，或者即時止賺止蝕
• 操作簡單：唔用設定價格，一click就可以完成落盤，特別啱新手
• 成交確定性極高：喺流通量大嘅股票（例如藍籌股），幾乎一定會成交

缺點

• 無法控制成交價：如果股價短時間內急速波動，成交價可能同你預期相差甚遠，呢個現象稱為「滑點」
• 流通量差嘅股票有風險：買賣差價（Bid-Ask Spread）較大嘅細價股，用市價單有機會令你以偏離預期嘅價格成交，甚至將股價「震散」
• 收市後落盤要留神：如果喺收市後落市價盤，第二日開市前又冇取消，公司突然出消息，成交價可能同預期差好遠

限價單：優點與缺點

優點

• 精準控制成本：只會以你設定嘅價格或者更好嘅價格成交，唔怕「高追」
• 適合流通量低嘅股票：買賣差價大嘅股份，用限價單可以慢慢等平位，慳返差價
• 唔用時時刻刻盯市：落盤之後可以耐心等，喺有效期內達到目標價自然成交

缺點

• 唔保證一定成交：如果股價一直冇觸及你嘅限價，訂單就會一直等，隨時錯過入市機會
• 有效期內市況可能大變：例如公司突然公布重大消息，股價急升急跌，你嘅限價盤有機會喺你意料之外嘅時機成交，甚至錯失更好嘅價位

訂單有效期同進階落單類型：ROD、GTC、IOC、FOK

落盤嘅時候，除咗揀「市價」或「限價」，仲要揀「訂單有效期」（Time in Force），呢個設定會直接影響你嘅訂單幾耐先失效、又或者接受幾多成交比例。常見類型如下：

• 當日有效（Day Order / ROD, Rest of Day）：訂單喺落盤當日交易時段內有效，即使未成交，收市後就會自動取消
• 有效至取消（Good Till Cancelled, GTC）：訂單會一直生效，直到成交或者你自己手動取消為止，唔會因為過咗一日就自動消失
• 有效至指定日期（Good Till Date, GTD）：你可以指定一個到期日，訂單過咗嗰日就自動失效
• 立即成交或取消（Immediate or Cancel, IOC）：落盤一刻可以先成交幾多就幾多，餘下未成交嘅部分自動取消，唔會留單
• 全部成交或取消（Fill or Kill, FOK）：要求即時全數成交，一旦做唔到就會全部取消，唔會部分成交

新手落盤嗰陣，如果冇特別選擇，好多平台會預設「當日有效」；但如果你想長時間掛住一個限價盤，唔想每日重新落單，就要記得改做「GTC」。

落單實戰要留意：五檔報價同內外盤

落盤前，善用交易平台提供嘅「五檔報價」（即最接近成交價嘅五個買盤同賣盤價位），可以幫你更精準判斷應該用市價單搶入場，抑或用限價單守候心目中嘅價位：

• 外盤成交：即成交價貼近賣方出價（Ask），代表市場買方積極追價，股價短期內偏向向上
• 內盤成交：即成交價貼近買方出價（Bid），代表市場賣方積極沽貨，股價短期內偏向向下

如果你留意到某股份「外盤」持續增加、股價節節上升，可能就係用市價單快速入場嘅時機；相反，如果股價喺一個區間上落，你更適合用限價單，慢慢等心水價位出現，唔用貼市價追入。

邊種情況應該用市價單？邊種應該用限價單？

適合用市價單嘅情況

• 想即時成交，唔太緊要成交價偏差一兩個價位
• 交易嘅係流通量高、買賣差價細嘅大型股份（例如恒指成分股）
• 交易量細（例如少於100股），差價對你嘅影響有限
• 想即時止賺止蝕，鎖定利潤或者控制風險

適合用限價單嘅情況

• 想精準控制成本，唔介意等
• 交易嘅係流通量低、買賣差價大嘅細價股
• 一次過落盤嘅數量比較大（例如過千股），輕微差價已經影響你嘅整體成本
• 想同現價有一定距離嘅目標價位入市或者離場

市價單同限價單各有優劣，選擇哪一種取決於你嘅交易需要：想快速成交，市價單係首選；想控制價格，尤其係交易量少嘅股票，限價單會係更合適嘅選擇。

常見問題

限價單同市價單，邊個成交快啲？

市價單一定比限價單快，因為市價單即刻以現價成交；限價單就要等到股價觸及你設定嘅價位先會執行，如果股價一直未到，訂單就會繼續等，甚至完全冇機會成交。

限價單落咗盤之後，可以隨時取消嗎？

一般嚟講，只要訂單未成交，你都可以隨時透過交易平台取消限價單；不過如果訂單已經部分成交，就只可以取消餘下未成交嘅部分，已成交嘅部分係不能撤回嘅。

新手應該優先揀市價單抑或限價單？

兩者冇絕對答案，要睇你交易嘅股票流通量。如果你買賣嘅係大型藍籌股，市價單通常已經足夠安全；但如果你交易細價股或者流通量低嘅股份，就建議用限價單，避免因為滑點而以偏離預期嘅價格成交。